Spænsk áhrif

Nýverið hófum við sölu á vínum frá fjórum víngerðarhúsum á Spáni. Þessi vínhús – Ossian, Tricó, Aiurri og Carraovejas – deila metnaði fyrir virðingu fyrir hefðum og djúpri tengingu við jarðveginn. Samanlagt köllum við þetta vínslóð (terroir) þótt e.t.v megi tengja fleiri þætti við það, t.d. veðurfar. Það er reyndar umdeilanlegt hvort  veðurfar teljist hluti af terroir (sem við köllum stundum vínslóð eða jafnvel jarðeigind). Það er hins vegar efni í annan pistil sem við erum strax byrjuð að skrifa.

Þessi sending er aðeins forsmekkurinn af því sem koma skal, enda mun úrval spænskra vína í versluninni margfaldast á næstu vikum - með aðstoð Hafliða, sem hefur um árabil byggt upp fagleg tengsl við víngerðarmenn á Spáni. Stórfréttir eru í vændum hvað þetta varðar.

Ossian

Ossian er staðsett í Nieva í Segovia héraði, í Castilla y León. Vínekrurnar eru í um 900-1000 metra hæð yfir sjávarmáli með sérstæðum sand- og kalkríkum jarðvegi. Hér eru á ferðinni ævaforn Verdejo vínviður, allt að 200 ára gamall. Þeir stunda lífræna og lífefnafræðilega ræktun og nota hefðbundnar aðferðir við víngerð.

Tricó

Tricó er víngerð stofnuð af Joseph "Pepe" Moreira í Rías Baixas í Galicíu, Norðvestur-Spáni. Pepe er þekktur sem "Albariño meistarinn" og vinnur eingöngu með þessa þrúgu. Vínekrurnar eru staðsettar nálægt Atlantshafinu þar sem sjávarrakinn og svalt loftslag skapar fullkomnar aðstæður fyrir Albariño.

Aiurri

Aiurri er lítil fjölskyldurekin víngerð í Rioja Alavesa. Hér einbeitir fjölskyldan sér að því að framleiða vín með hefðbundnum aðferðum, með sérstöku tilliti til landslagsins og umhverfisins. Aðallega eru ræktaðar Tempranillo þrúgur en líka nýttar staðbundnar þrúgur.

Carraovejas

Carraovejas er staðsett í Ribera del Duero, nánar tiltekið í Peñafiel. Það er nokkuð ungt að árum, stofnað árið 1987. Aðallega notaðar Tempranillo (sem kallast Tinto Fino á þessu svæði), Cabernet Sauvignon og Merlot þrúgur. Vínekrurnar eru í 850 metra hæð með sérstökum kalksteins- og leirjarðvegi sem gefur vínunum sérstakan blæ.