90 ára gamall vínviður

Í þorpinu Flagey-Echezeaux, er að finna víngerð sem hefur verið í eigu sömu fjölskyldu frá upphafi. Domaine Desaunay-Bissey á rætur að rekja til samstarfs Bruno Desaunay og tengdaföður hans, Daniel Bissey, sem stofnuðu víngerðina árið 1975.

Eftir Elías Blöndal Guðjónsson

31. mars 2025

Við heimsóttum Richard á síðasta ári, stuttu eftir að faðir hans, Bruno , lést. Sonur hans hafði þá tekið við rekstrinum og hafði fangið fullt af verkefnum. Hann gaf sér tíma til þess að leyfa okkur að smakka afrakstur 2022 árgangsins en einnig nokkur eldri vín.

Richard hefur þá sýn að hefðin sem faðir hans lagði grunn að, sé sú sem muni skila árangri. Bruno lagði áherslu á að nota gamlan vínvið og sem minnsta íhlutun. Minni uppskera er af gömlum plöntum, þær verða gamlar og lúnar líkt og mannfólkið. Vínviðurinn myndar færri klasa og minni ber. Þetta er þó kostur fyrir gæðin, því plantan beinir orku sinni að færri þrúgum á meðan djúpt rótakerfið nær í jarðefni og næringarefni sem yngri plöntur ná ekki til. Vínviðurinn á mörgum ekrum er mjög gamall, sumar plönturnar eru jafnvel yfir 80-100 ára. Í Grands-Echezeaux var vínviðurinn að stórum hluta gróðursettur upp úr 1928 og er því um eða yfir 90 ára gamall. Þessi gamli vínviður gefur af sér lítið en kraftmikið vín.

Vínviður er ræktaður á um 6 hekturum í Chambolle-Musigny, Nuits-Saint-Georges, Flagey-Echezeaux, Vosne-Romanée og Gevrey-Chambertin. Dreifing vínekranna um ólík þorp gerir Richard kleift að fanga fjölbreytt einkenni jarðvegsins.

Eins og háttar til um mörg víngerðarhús í Búrgúndí þá var lengst af stærstur hluti af uppskerunni seldur til annarra framleiðenda. Það var ekki fyrr en á allra síðustu árum sem vín Desaunay-Bissey hafa vakið verðskuldaða athygli.

Bruno Desaunay var ástríðufullur víngerðarmaður, hlaut uppeldi sitt á vínekrunum. Árið 2007 ákvað hann að hætta með öllu notkun illgresis- og skordýraeiturs á ekrunum. Síðan þá hefur lutte raisonnée – hófsamri lífræn ræktun – verið fylgt. Lutte raisonnée, sem þýðir ,,skynsamleg barátta” á frönsku, er nálgun í vínrækt þar sem notkun efna er stillt í algjört lágmark en ekki útilokuð líkt og í fullri lífrænni ræktun.

Víngerðin sem slík er einnig áhugaverð fyrir margra hluta sakir en öll íhlutun er í lágmarki. Ferlið er þannig að fyrst er stutt kaldgerjun fyrir gerjun til að ná fram lit og ilm án óþarfa beiskju. Eftir gerjunina lúta vínin löngu þroskaferli á frönskum eikartunnum, þar sem um þriðjungur tunna er ný eik (meira í tilviki Grand Cru vína). Vínin eru síðan sett á flöskur án þess að fara í gegnum síur eða hreinsun.

Fyrir jólin fengum við nokkur vín frá Desaunay-Bissey, þar á meðal Vosne-Romanée 1er cru Les Rouges 2017, sem reyndist afar eftirsótt og hvarf fljótt úr hillunum. Við eigum enn nokkrar flöskur af vínum úr 2021 árganginum sem hafa veitt okkur mikla ánægju. Árið 2021 var krefjandi í Búrgúndí. Þar var við að etja mikið frost um vorið, myglu og rigningu, sem leiddi til minni uppskeru en venjulega. Þrátt fyriþessar áskoranir tókst Desaunay-Bissey að búa til vín með góðum ferskleika. Þessi vín frá 2021 einkennast af fínleika og góðu jafnvægi.

Ný og gömul vín koma snemmsumars

Í byrjun sumars eigum við von á eftirfarandi vínum:

Bourgogne Côte d’Or 2022 og 2021
Gevrey-Chambertin 2021
Nuits-Saint-Georges ‘Les Belles Croix’ 2021, 2017 og 2014
Chambolle-Musigny 2021
Vosne-Romanée 2022
Vosne-Romanée 1er cru ‘Les Beaux Monts’ 2020
Vosne-Romanée 1er cru ‘Les Rouges’ 2018
Grands Echezeaux Grand Cru 2021 og 2022

Þetta úrval sýnir vel breidd víngerðarinnar - allt frá héraðsvínum upp í Grand Cru. 2021 og 2022 henta vel til geymslu og munu verðlauna þolinmóða viðskiptavini en það má vel njóta þeirra núna með góðri loftun. Grands Echezeaux eru vitaskuld sérstaklega spennandi þar sem vínviðurinn er um og yfir 90 ára gamall, líkt og áður segir.