Ítölsk vín og íslensk þoka?
Leifur á La Primavera er eins og við mikill áhugamaður um Piemonte hérað sem liggur norð-vestan megin á Ítalíu. Nebbia þýðir þoka á ítölsku, eins og nepja á íslensku. Vegna tíðra þokuskilyrða í Piemonte er frægasta þrúga svæðisins nefnd Nebbiolo.
Við tókum hús á Leifi og smökkuðum einfalda og þægilega rétti með tveimur vínum frá Reverdito, annarsvegar Langhe Nebbiolo og svo Barolo Riserva.
Vínið kemur úr bestu hlutum þriggja bestu ekra þessa húss og úr einum besta árgangi seinni tíma. Hreint út sagt ljúffengasta Barolo sem við höfum smakkað. Fullveðja og komið á sitt besta skeið. Hitinn reyndist hóflegur og ræktunartíminn langur sem sannaði máltækið um að góðir hlutir gerast hægt.
Leifur og hans fólk keyptu umsvifalaust upp allan lagerinn sem auðvitað eru ekki slæmar fréttir því þar með er bara enn ein viðbótar ástæða til að heimsækja staðinn og senda okkur ósk um að komast á biðlistann þegar næsta sending kemur. Í millitíðinni er svo vitaskuld hægt að gæða sér á litla bróður, Nebbiolo Simane í hefðbundinni stærð og tvöfaldri.
