Í hug fólksins kemur sumarið ekki fyrr en sumarskipið kemur til hafnar með vistir. Þannig er siglingin yfir hafið með Búrgúndarvínin hluti af fólkinu sjálfu, persónuleg fylgja þess.

Heildarlista yfir öll vínin í sendingunni er hægt að nálgast með því að smella hér.

Edouard Confuron er nafn sem viðskiptavinir ættu að leggja á minnið. Frá þorpinu Vosne-Romanée spretta nú upp nýir og hæfileikaríkir framleiðendur með reglulegu millibili. Edouard Confuron er sonur hjónanna sem rækta og selja vín undir nafninu Confuron-Gindre. Það er lítt þekktur framleiðandi þótt hann sé með býsna mikla framleiðslu. Edouard vinnur enn við hlið föður síns en hefur fengið til eigin framleiðslu nokkrar ekrur eða samtals um 1,5 hektara en hann framleiðir 7 mismunandi vín undir eigin nafni. Faðir hans gerir vín með frekar hefðbundnum aðferðum, eins og gefur að skilja en hann er að verða sextugur.

Stíll Edouard er léttari og nútímalegri, hann notar minni nýja eik og meira af heilknippum. Þetta eru vissulega engin ný vísindi en stundum geta minnstu breytingar með kynslóðaskiptum gert kraftaverk. Santé veðjar á þennan nýja leikmann frá Vosne-Romanée. Sagt er að frá þorpinu komi engin almúgavín og fer það vel saman við stefnumörkun vínbúðarinnar.

Víngerðarhúsið Morey-Coffinet var sett á fót á síðari hluta 8. áratugarins. Það rennur vín í æðum fjölskyldunnar en sonur hjónanna Michel Morey og Fabienne, Thibault, situr nú við stjórnvölinn og hefur gert síðan 2009. Rætur Morey-Coffinet liggja í Chassagne-Montrachet en frá húsinu fást vín af nokkrum 1er Cru ekrum, m.a. La Romanée, Morgeot, Les Houilleres, Les Pucelles og en Cailleret sem hér er sýnd böðuð sólargeislum. Thibault gerir líka inngangsvín, bæði hvítt og rautt, og Grand Cru, m.a. af ekrunni Batard-Montrachet sem sýnd er á myndinni hér fyrir neðan. Húsinu eru gerð ágæt skil í myndinni "A year in Burgundy" þar sem fylgst er með lífsins gangi í eitt ár hjá nokkrum víngerðarfjölskyldum. Megináhersla handverkshúsa er á sjálfa ræktunina sem er lífræn og lífefld (organic og biodynamique) sem þýðir að þeir sem vilja skordýraeitur eða illgresiseyði verða bara að bæta slíku út í eftir á. En sjálf víngerðin skiptir líka máli og hér hefur nú í nokkur ár verið notast við egglaga leirker og glerkúlur að hluta til í stað eikartunna sem hefur minni áhrif á vínið, eykur ferskleika og ýtir undir að upprunaeinkenni hverrar ekru skili sér í hinu endanlega víni.