Vilmart er franskt fjölskyldufyrirtæki sem hefur framleitt sérstæð kampavín frá árinu 1890. Eitt af einkennum stórkostlegra vína er að þau flokkast sem matarvín, henta tilteknum mat og jafnvel stað og stund en ekki bara sem fordrykkjarvín.

Vínin frá Vilmart eru nefnilega eindregið ætluð til þess að njóta með mat þó svo að þau séu auðvitað ljúffeng líka ein og sér. Hér eru þrúgurnar (Pinot Noir og Chardonnay) pressaðar upp á gamla mátann og allt vín þroskað á eikarámum og malo/lactic gerjun fyrirbyggð sem eykur á ferskleika.

Með hæfilegri einföldun má skipta kampavínsframleiðendum í ræktunar- og samlags-hús. Í stuttu máli má segja að algengt sé í landbúnaði að framleiðslan sé kennd við verksmiðjuna sem framleiðir vöruna frekar en bóndann sem ræktar hráefnið. Í tilfelli ræktunarhúsa er þessu öfugt farið. Hugmyndafræðin snýst um að gera sérstæð vín frá tilteknum svæðum og jafnvel af einni ekru. Markmiðið er að vínið endurspegli þann jarðveg sem þrúgurnar vaxa úr frekar en víngerðarmanninn sem blandar af mismunandi svæðum í sína húsblöndu. Til að ná fram sem mestu af upprunaeinkennum (persónuleika) er slík ræktun oftast undir formerkjum lífrænnar og/eða lífefldrar ræktunnar án vökvunar. Án þess að kasta rýrð á stærri verksmiðjuhús þá finnst okkur kampavín frá ræktunarhúsum áhugaverðari svona rétt eins og háttar til með einstaklinga með persónutöfra.

Myndin sýnir Cocquard pressu hússins sem hefur staðist tímans tönn.