Í Víngarðinum má lesa persónulegar hugleiðingar Þorra Hringssonar um vín og annað sem honum dettur í hug.

Í nýlegri úttekt fjallar Þorri um fjögur Bourgogne Chardonnay sem öll fást á Sante.is. Við gripum færsluna og umfjöllun um eitt vín af fjórum en við bendum lesendum fréttabréfsins á að heimsækja Víngarðinn til að lesa um hin þrjú.

Það er ekki á hverjum degi að Víngarðurinn fær tækifæri til að smakka, hlið við hlið, fjögur Chardonnay-vín frá Búrgúnd sem öll eru skilgreind sem Bourgogne Blanc frá árinu 2021, en það gerðist einmitt í síðustu viku og fullt tilefni til að skýra frá því hér.  Öll eru vínin flutt inn af Santé sem er af mörgum að góðu kunnugt fyrir að ryðja brautina fyrir netsölu á vínum og berjast fyrir eðlilegu viðskiptafrelsi fyrir landsmenn.

Ég hef áður minnst á það að Bourgogne Blanc er víðasta skilgreiningin á hvítum Búrgúndarvínum og getur, tæknilega séð, innihaldið þrúgur einsog Pinot Blanc og Aligoté en margir framleiðendur tilgreina á flöskumiðanum að um sé að ræða Chardonnay og þá verður innihaldið auðvitað að vera Chardonnay, þótt þrúgurnar geti komið hvaðan sem er innan þess svæðis sem er skilgreint sem Bourgogne.  Nýlega var svo leyft að þrengja þessa skilgreiningu lítillega og standi Côte d’Or á miðanum þá koma þrúgurnar sannarlega þaðan, en ekki td frá Chablis eða Côte Châlonnais (svo tvær af nokkrum skilgreiningum innan Bourgogne séu nefndar).  Flestir betri framleiðendur í Gullnu Hlíðinni gera þó eingöngu vín úr þrúgum sem þeir rækta á eigin ekrum og sum vín sem eru skilgreind sem Bourgogne Blanc (eða Chardonnay) koma sannarlega frá svæðum eins og Puligny eða Meursault.

Árgangurinn 2021 var ekki mikill af magni en vel yfir meðallagi að gæðum og hvítvínin eru ögn suðrænni en oft áður þótt þau séu hreint ekki exótísk.  Einföldu hvítvínin einsog Bourgogne Blanc/Chardonnay ætti auðvitað ekki að geyma í mörg ár en þau eru fersk og afar neysluvæn núna.

Domaine Chavy Chouet Les Femelottes 2021 ****1/2

Les Femelottes kemur af nafngreindri ekru í Puligny þótt hún sé hafi ekki þorpskilgreiningu (og auðvitað ekki Premier eða Grand Cru) en hún ber uppruna sínum skýrt einkenni.  Ljósgyllt að lit með aðlaðandi og ríflega meðalopna angan sem er semmtilega flókin.  Soðin epli, niðursoðnar perur, hunang, steinaávextir, strokleður og sætir laktískir tónar. Meðalbragðmikið með rúnnaðan og ferskan ávöxt sem er í afar góðu jafnvægi og endist vel.  Sítrónubúðingur, perujógúrt, ananas, pera, hunang, ferskjur og mild steinefni.  Afar vel gert og skemmtilegt hvítvín.

Verð kr. 4.500.- Frábær kaup.