2015 Cepa Gavilan Crianza Magnum - 1,5 lítra flaska

Páskabræður, Hermanos Perez Pascuas, í Pedrósu eru með virtustu vínræktendum í því ágæta vínhéraði Ribera del Duero á heiðunum norðan Madrid á Spáni. Vínmeistarinn Tim Atkin flokkar Pedrósu með stóryrkjum (Grand Cru) héraðsins ásamt Vega Sicilia o.fl.

Páskabræður eru íhaldssamir víngerðarmenn og hafa litlu breytt gegnum árin en 2004 ákváðu þeir að bæta yngra og léttara víni, Cepa Gavilan, við sitt hefðbundna vöruval, Viña Pedrosa Crianza, Reserva og Gran Reserva. Sama ár hættu þeir framleiðslu Viña Pedrosa Joven sem var s.k. Semi Crianza en þær voru tískufyrirbrigði um aldamótin.

Gamaldags vínin frá Pedrósu, fyrstu vínin sem flutt voru til Íslands frá Ribera del Duero af frumkvöðlinum Beri, höfðu notið nokkurrar hylli Íslendinga en hið aðgengilega Cepa Gavilan heillaði landann mest.

Cepa Gavilan var eitt af 12 uppáhalds Ribera del Duero vínum fyrrgreinds Tim Atkin.