Við myndum þó ekki tala um stórstirni heldur skæra smástjörnu því heildar framleiðslan er einungis um 35.000 flöskur. Hjónin Eric Dhondt og Edith Grellet ákváðu árið 1986 að hætta að selja þrúgur sínar til samlagshúsa og hófu að selja vín undir sínum nöfnum, Dhondt-Grellet.

Þar með flokkast starfsemin sem ræktunarhús. Sonur þeirra, Adrien, hefur nú tekið við búinu. Hér er allt lífrænt og lífeflt en Adrien kærir sig ekki um vottanir í þeim efnum. Hross í stað dráttarvéla eru notuð við öll störf á ekrunum til þess að fyrirbyggja þjöppun á jarðveginum.