Velkomin í heillandi heim Chianti sem þekkt er fyrir samnefnd rauðvín sem að grunni til eru gerð úr þrúgunni Sangiovese. Í Chianti fyrirfinnst óspillt náttúra og töfrandi andrúmsloft. 

Leirkenndur jarðvegur er einkennandi fyrir Toscana að undanskildu Chianti. Hérna er sandsteinn og galestro (leirkennt og mjúkt grjót sem klofnar í þunnar skífur með tímanum) ásamt hörðum hvítum kalksteini sem kallast albarese, algeng blanda. Þessi einstaka staðsetning er paradís á jörð fyrir vínframleiðslu en jarðvegurinn er jafnframt afar mismunandi milli hinna 11 mismunandi svæða innan Chianti Classico flokkunarinnar.

Jarðvegurinn í Chianti gefur af sér fínleg og fáguð vín sem á sama tíma eru afar fjölþætt. Sangiovese þrúgan er hjarta Chianti vínanna en þau eru oftast léttari á fæti heldur en t.d. Brunello di Montalcino vínin úr Toscana. 

Framleiðendurnir okkar stunda allir lífræna ræktun sem þýðir að vínin eru laus við leyfar af skordýraeitri og illgresiseyði. Slík ræktun tryggir til lengri tíma litið að vínviðurinn róti sig dýpra í gegnum fleiri jarðlög og gefi þannig af sér fjölþættari vín auk þess að þola betur þurrkatíð. Það líklega kemur fáum á óvart að fyrir valinu hjá okkur hafi orðið framleiðendur sem leitast við að framleiða fáguð og fínleg vín án kemískra bætiefna, semsagt gamaldags víngerð en með nútíma áherslum.

Fyrir þá sem vilja upplifa raunverulega sveitasælu er vel hægt að mæla með ferðalagi hingað og jafnvel hjólandi líka þar sem margir framleiðendur bjóða upp á heimsóknir og sumir hverjir stunda fínan veitingarekstur á afar sanngjörnu verði.

Þrátt fyrir úrhellis rigningu var líklega ánægjulegasta heimsókn okkar til Cigliano di Sopra sem staðsett er í San Casciano í Val di Pesa. Þetta Chianti Classico svæði er það nyrsta af þeim öllum en í þessum ævaforna árfarvegi eru ávalar steinvölur fyrirferðarmiklar í jarðveginum. Hér mætist gamall og nýr heimur því víngerðin hér á rætur aftur til 14. aldar en er nú í höndum líklega yngstu víngerðarmanna sem við höfum hitt á okkar ferðum. Maddalena er afkomandi eigenda jarðarinnar en hún nýtur liðsinnis skólafélaga sinna við vínræktina sem öll hafa mikla ástríðu fyrir víngerðinni. Að hluta til hefur miklum húsakosti verið breytt í ferðaþjónustu fyrir hópa eða fjölskyldur til að leigja. Unga víngerðarfólkið tekur vel á móti okkur en tómar flöskur í kjallaranum koma upp um þau sem áhugafólk um Burgundy. Í garðinum eru ræktaðar yfir 100 yrki af sítrónum og ljóst að hér eru á ferðinni miklir náttúruunnendur sem nota hvorki eitur né áburð og ræktunin er ekki einungis lífræn heldur líka lífefld. Gerjunin fer fram í stáltönkum og vínið fær svo að liggja á frönskum eikartunnum. Hjá Cigliano di Sopra eru framleiddar u.þ.b. 21.000 flöskur á ári.

Vínið

• 2021 Cigliano di Sopra Chianti Classico DOCG. 100% Sangiovese. Gerjunin fer fram í stáltönkum og vínið fær svo að liggja á frönskum eikartunnum. Vottað lífrænt og lífefld ræktun.

I Fabbri, stofnað 1620 í Lamole sem þekkt er fyrir ilmkennd og frekar ljós vín úr sendnum vínekrum sem standa í 550-650 metra hæð yfir sjávarmáli. Lamole, sem tilheyrir Greve in Chianti, er minnsta svæðið í Chianti Classico en gæti verið það áhugaverðasta. Hér örlar oft á kirsuberjum og hindberjum í bragði. Víngerðin er vottuð lífræn. Hér var eitt sinn varðturn til að verjast ásókn nágrannana frá Flórens áður en tókst að sameina landið undir eina yfirstjórn sem líklega var framfaraskref.

Gestrisni Susönnu er einstök. Vínsmökkunin fer fram utandyra en Susanna býður upp á þriggja rétta hádegisverð. Fjölskylda hennar hefur átt jörðina síðan 1600 en fyrstu vínflöskurnar voru framleiddar á búinu árið 1920 en það var ekki algengt á þeim tíma því yfirleitt seldu bændur þrúgurnar til samlagshúsa sem síðan blönduðu þeim öllum saman í einn graut. Vínræktin í Lamole fer oft fram á manngerðum pöllum sem eru búnir til með hlöðnum veggjum því hlíðarnar eru afar brattar. Þessir pallar eru margir margra alda gamlir. Susanna þekkir hverja einustu grein á hverjum einasta vínvið og lýsir því hvernig greinarnar segja sögu jarðvegsins.

Vínin

• 2021 I Fabbri Chianti Classico DOCG. 100% Sangiovese. Vínviðurinn er í 550-650 metra hæð yfir sjávarmáli og hér er allt vottað lífrænt. Létt og fágað vín sem fær aldrei að sjá eik heldur liggur á steinsteyptum tönkum. Vottað lífrænt.
• 2021 I Fabbri Chianti Classico Terra di Lamole DOCG. 90% Sangiovese og 10% Canaiolo. Vínviðurinn er í 550-650 metra hæð yfir sjávarmáli og hér er allt vottað lífrænt. Létt og fágað vín sem fær aldrei að sjá eik heldur liggur á steinsteyptum tönkum. Vottað lífrænt.