Margir sem höndla með vín leita eftir nýstirnum í hvítvínsheiminum. Þrátt fyrir að ,,auðlindum” Burgundy héraðs hafi fyrir löngu verið úthlutað, spretta enn fram ný víngerðarhús, gjarnan þegar afkomendur taka við af foreldrum og/eða hús sameinast með nýjum hjónaböndum. Í tilfelli Bachelet-Monnot tóku bræðurnir Marc og Alexander sig til árið 2005 og stofnuðu húsið. Hér er nákvæmlega sama vinna lögð í öll vín, hvort heldur er minni og ódýrari vín frá Maranges eða þau dýrari frá Chassagne og Puligny sem segja má að sé svo undirstrikað í háum dómum sem vínin fá.

Markmið bræðranna er umfram allt ferskleiki, lítil notkun á eik og fyrir átöppun eru vínin geymd á stáltönkum. Inngangs vínin eru Bourgogne Rouge og Bourgogne Blanc sem við fullyrðum að séu með þeim bestu sem framleidd eru í þeim flokki. Því miður fáum við lítið sem ekkert af þeim úthlutað en vonumst eftir meiru. Maranges 1er Cru La Fussiere kemur út lítilli kalksteinsræmu úr ekrunni sem annars er eingöngu rauð (einungis 5% vína af svæðinu eru hvít).

Hugtakið ferskleiki kemur alltaf upp í hugann þegar rauðvínin eru smökkuð, bæði frá Maranges og Santenay en áferðinni mætti líkja við flauel.

Í þorpinu Flagey-Echezeaux, er að finna víngerð sem hefur verið í eigu sömu fjölskyldu frá upphafi. Domaine Desaunay-Bissey á rætur að rekja til samstarfs Bruno Desaunay og tengdaföður hans, Daniel Bissey, sem stofnuðu víngerðina árið 1975.

Við heimsóttum Richard á síðasta ári, stuttu eftir að faðir hans, Bruno , lést. Sonur hans hafði þá tekið við rekstrinum og hafði fangið fullt af verkefnum. Hann gaf sér tíma til þess að leyfa okkur að smakka afrakstur 2022 árgangsins en einnig nokkur eldri vín.

Richard hefur þá sýn að hefðin sem faðir hans lagði grunn að, sé sú sem muni skila árangri. Bruno lagði áherslu á að nota gamlan vínvið og sem minnsta íhlutun. Minni uppskera er af gömlum plöntum, þær verða gamlar og lúnar líkt og mannfólkið. Vínviðurinn myndar færri klasa og minni ber. Þetta er þó kostur fyrir gæðin, því plantan beinir orku sinni að færri þrúgum á meðan djúpt rótakerfið nær í jarðefni og næringarefni sem yngri plöntur ná ekki til. Vínviðurinn á mörgum ekrum er mjög gamall, sumar plönturnar eru jafnvel yfir 80-100 ára. Í Grands-Echezeaux var vínviðurinn að stórum hluta gróðursettur upp úr 1928 og er því um eða yfir 90 ára gamall. Þessi gamli vínviður gefur af sér lítið en kraftmikið vín.

Vínviður er ræktaður á um 6 hekturum í Chambolle-Musigny, Nuits-Saint-Georges, Flagey-Echezeaux, Vosne-Romanée og Gevrey-Chambertin. Dreifing vínekranna um ólík þorp gerir Richard kleift að fanga fjölbreytt einkenni jarðvegsins.

Eins og háttar til um mörg víngerðarhús í Búrgúndí þá var lengst af stærstur hluti af uppskerunni seldur til annarra framleiðenda. Það var ekki fyrr en á allra síðustu árum sem vín Desaunay-Bissey hafa vakið verðskuldaða athygli.

Bruno Desaunay var ástríðufullur víngerðarmaður, hlaut uppeldi sitt á vínekrunum. Árið 2007 ákvað hann að hætta með öllu notkun illgresis- og skordýraeiturs á ekrunum. Síðan þá hefur lutte raisonnée – hófsamri lífræn ræktun – verið fylgt. Lutte raisonnée, sem þýðir ,,skynsamleg barátta” á frönsku, er nálgun í vínrækt þar sem notkun efna er stillt í algjört lágmark en ekki útilokuð líkt og í fullri lífrænni ræktun.

Víngerðin sem slík er einnig áhugaverð fyrir margra hluta sakir en öll íhlutun er í lágmarki. Ferlið er þannig að fyrst er stutt kaldgerjun fyrir gerjun til að ná fram lit og ilm án óþarfa beiskju. Eftir gerjunina lúta vínin löngu þroskaferli á frönskum eikartunnum, þar sem um þriðjungur tunna er ný eik (meira í tilviki Grand Cru vína). Vínin eru síðan sett á flöskur án þess að fara í gegnum síur eða hreinsun.